流浪卡加利 Rove in Calgary

其中一條在我Facebook網誌的常見問題是我在卡加利如何搵工，所以我決定分享我在卡加利搵工心路歷程。

 

2018年6月我到了卡加利，休息了一陣子，中間返左香港一個月，11月回來便決定搵工。一開始我沒有限制工種，當時工資不是考量，反正更想係融入卡加利生活拿點工作經驗，於是會計辦公室文職超市都在我搜索範圍。最後在FB見到果汁店請兼職於是去試下。咁啱果汁店另一個staff要辭職，於是老闆便叫我直接做長工。老闆話我唔應該浪費個CPA，話果汁店可以用來適應生活，但長遠應該搵份會計工，於是我又開始搵下工。由於卡加利主流是油公司，在香港big 4時冇audit，即使有8年Big 4經驗係卡加利毫無幫助，大學面試後冇再搵工既我都有少少灰，毫無方向。開始沒有成功，但朋友同我講有面試機會已經好好，因為經濟不太好，一個面試機會都唔容易得到。

 

有次面試個CFO，佢公司其實冇opening ，佢覺得好可惜，覺得我應該去做下big 4拎經驗，之後揾工會易好多，於是佢refer我去Big 4。面試左兩Round，首先見HR，佢約我面試地方竟然係Starbucks😱，佢要我講下工作經驗，點解搬去卡加利等。差唔多完時佢就介紹Audit Stream，要我係 Public Companies；Enterprise （非油公司）；類似Small Business，我唔太記得係咩，但我一聽就覺得唔會揀，入面選擇一個。我記得我揀左Enterprise，因為同自己在香港經驗相關，但佢地話我適合做Public Companies，於是我就去Second In，第二日就出offer俾我，就係咁我就再開始審計之路。後來同朋友傾開，毫無加拿大工作經驗和學歷，對Oil and Gas冇認識的我可以得到big 4工作是很幸運了，大家都說很多人最後也是在華人主導的公司工作，也有很多人做唔返老本行。入了Big 4後認識了不同國家移民到卡加利的同事，後來發現大家故事也雷同。有個英國藉朋友，她在英國拿了CPA，為了另一半搬到加拿大，經歷了漫長的搵工之路，最後都係Big 4 請佢。

 

其實我搵工都算好好彩，唔係搵左好耐，亦有唔少人幫我，又誤打誤撞入了Big 4。因為我中間其實都係好Hea咁Send左幾次CV，之後抱著冇既就求其返份工既心態。搵工過程中，有次見上市公司會計部，佢地招聘由Head Hunter負責，以下既事令我印象好深刻：

 

1. Head Hunter 問我點解我英文咁好同咁native，問我係邊度學。我個刻心諗，本地人真係覺得亞洲人英文好差？但我都一本正經咁吹返去Sell下自己係香港既經驗同Qualification等BlaBlaBla。後尾In完諗返，係果汁店工作時同個伯伯傾計時佢發現我搬左去加拿大幾個月佢好Surprised，佢話聽我D英文以為我係卡加利大 （佢又誇張左D），因為佢話亞洲移民來卡加利既人一般英文都唔好，所以估唔倒我係”新移民”。

 

2. 當時我只係In個普通既會計職位，佢話我太overqualified，但亦都指出我在加拿大會計經驗係零，好多較本地人主導既公司都會比較卻步，因為文化差異呢樣野係比較難處理，又或者佢地都唔familiar去同一個”新移民”工作。我聽到呢個Point時我其實都好明白，即使你講話你適應力強等，中西文化差異是一個唔係可以齋用吹水可以解決既事。而呢件事，有次係我Send CV去一間Local會計執數公司時再次發生。我記得我Send左個CV後，間公司勁快回我話一定要有加拿大會計工作經驗。

 

若你問我在卡加利搵工難唔難，我會反問你你追求D咩。如果你只係要一份工，在卡加利真的不難，快餐店餐廳超市這些拿最低工資的工作隨處可見。但如果你想搵份你鍾意，福利好或者人工同香港差唔多既，我覺得一D都唔易 （當然都好睇彩數）。 你問我當時由日日坐係Office既Audit Manager變做日日企係度整果汁（每日都好攰），又要備貨等做一D我完全冇做開既野，一開始我當然會唔習慣，但我當時抱著學做果汁同拎下經驗既心態，其實都返下返下都幾開心。我黎卡加利前打算從零開始慢慢Build Up（雖然另一半係度住左10年以上），所以其實咩都冇謂。

 

我覺得搵工／移民過程中心調節好重要，亦都要諗清楚自己點解想移民。做每件事一定會有犧牲，魚與熊掌不可兼得。其實移民過黎，每個都放棄好多野。我都有聽過好多人為左移民（可能係為左下一代或者係絕望），會”申”係度好悶，搵唔到想要既工等，雖然離開了原居地但不快樂。如果花左咁多時間，金錢，心神而沒有變得快樂一點，我個人覺得有點不值，所以移民真係要諗清楚，心態會影響好多事情。如果你認為一份好工係好好好重要，我會同你講你不如留返係香港，因為冇人答到你移民後搵唔搵你滿意既工同你要搵幾耐。但如果你移民係為左政局而離開現居地，咁你滿足到最大的心願意－移民，其他野可以慢慢黎既，呢個心態你既移民路會快樂點。

 

在卡加利搵工路上的你或在計劃移民的你，希望可以俾到少少啟發你。遲少少會再分享一下當時的移民心理建設。

 

如想了解更多有關卡加利資訊，歡迎跟蹤和讚好我的Facebook和IG。

 

Facebook：流浪卡加利／Rove in Calgary

https://www.facebook.com/roveincalgary

 

IG： Rove_in_calgary / 流浪卡加利